ཆོས་འབྱུང་འདི་ནི་དུས་རབས་བཅུ་དགུ་པའི་དུས་མགོར་མདོ་སྨད་ཀྱི་ལྗོངས་སུ་དགེ་ལུགས་པའི་གྲུབ་མཐའ་ཆེས་ཆེར་དར་བའི་སྒང་། བླ་བྲང་དགོན་པ་ལྟེ་བར་བྱས་པའི་ཆོས་སྲིད་ཟུང་འབྲེལ་གྱི་སྲོལ་ཡང་དར་ཡོད། དེར་བརྟེན་བླ་བྲང་དགོན་པར་སྒྲ་དང་ཚད་མ། བཟོ་དང་གསོ་བ། ནང་རིག་པ། སྙན་ངག་སྡེབ་སྦྱོར། རྩིས་དང་མངོན་བརྗོད། ཟློས་གར་བཅས་རིག་གནས་བཅུ་བོ་འཆད་ཉན་སློབ་གཉེར་གྱི་གྲྭ་ཚང་ངམ་འཛིན་གྲྭ་ཚུགས་ཡོད་གཤིས། ཀྲུང་གོའི་བོད་ཀྱི་རིག་གནས་འཕེལ་རྒྱས་ལའང་ཕན་ཐོགས་ཆེན་པོ་བྱུང་སྣང་། སྐབས་དེ་ཙ་ན། དབལ་མང་པཎྚི་ཏས་ཨ་མདོའི་རྒྱུ་མཚན་ཤེས་མཁན་དཀོན་པས་ཆོས་འབྱུང་འདི་ལྟ་བུ་ཞིག་འབྲི་དགོས་ཞེས་པའི་བཀའ་དང་། གཞན་ཡང་། དགའ་ལྡན་ཐེ་བོ་སྤྲུལ་པའི་སྐུ། དཔའ་རིས་སྔོ་ཁོ་ངག་དབང་ལེགས་བཤད་ཉི་མ་སོགས་གནས་ལྔ་རིག་པའི་གཏེར་མཛོད་དུ་གྱུར་པ་དུ་མས་ཡང་ཡང་བསྐུལ་བར་བརྟེན། རྩོམ་པ་པོས་སྐབས་དེའི་དགོས་པ་དང་བསྟུན། བརྩམ་པར་བྱ་བའི་འགན་འཁྲི་ལྷུར་བཞེས་ཏེ། བཀའ་ཆེམས། ཆོས་འབྱུང་། དེབ་ཐེར། ལོ་རྒྱུས། རྣམ་ཐར། བསྟན་རྩིས། འཁྲུངས་རབས། གདུང་རབས། རྒྱལ་རབས། གདན་རབས། རྟོགས་བརྗོད། དཀར་ཆག  རུས་མཛོད་སོགས་ལོ་རྒྱུས་རིག་པའི་རྩོམ་གཞུང་རྣམ་གྲངས་ལྔ་བརྒྱ་སུམ་ཅུ་ལྷག་གནས་གཟིགས་གནང་ཞིང་། རྨ་ཆུ། ཀླུ་ཆུ། བསང་ཆུ། དགུ་ཆུ། ཙོང་ཆུའི་རྒྱུད་སོགས་ཡུལ་གྲུ་དང་ས་ཁུལ་མང་པོར་ཆིབས་བསྐྱོད་དེ། དྲི་གཏུགས་དངོས་ཀྱི་ཐོག་རྩོམ་སྒྲིག་གནང་བས། སྤྱི་ཁོག་ལ་ཚད་ཐུབ་ཀྱི་ཡིད་རྟོན་རུང་བ་སོགས་ཕུལ་དུ་བྱུང་བའི་ཁྱད་ཆོས་ལྡན་པ་བཅས་བསྔགས་འོས་པའི་གསུང་རབ་རྩ་ཆེན་ཞིག་ཡིན་ནོ། །